Pakica Boshnjake Var Shpresat Tek Zgjedhjet

Pakica boshnjake në Kosovë, pak e njohur, ka vuajtur më shumë se pjesa më e madhe e banorëve në Kosovë.

Autoritetet serbe i kanë konsideruar ata armiq, por edhe tani ata vazhdojnë të përballen me diskriminim dhe kërcënime.

Megjithatë, në prag të zgjedhjeve bashkiake, drejtuesit e pakicës janë optimistë se e ardhmja e komunitetit të tyre do të ndryshojë.

Gjatë pjesës më të madhe të periudhës së Millosheviqit, boshnjakët kanë vuajtur të njëjta privime si shqiptarët. Pakica, e cila ka qenë rreth 60,000 vetë, është trajtuar veçanërisht keq pas shpërthimit të konfliktit të Bosnje.

"Ne fillim të luftës në Bosnje ne konsideroheshim armiq," thotë Numan Baliq, drejtuesi i Partisë së Aksionit Demokratik të Boshnjakëve, SDA. "Shumë anëtarë të komunitetit tonë u burgosën dhe rreth 20,000 u dëbuan. Të dëshpëruar, disa boshnjakë kanë bashkëpunuar me regjimin serb, gjë e cila ende përbën një burim tensioni me shqiptarët e Kosovës. Që prej përfundimit të luftës në Kosovë," thotë Baliq, "shqiptarë ekstremistë të armatosur na e kanë bërë jetën tepër të vështirë. Tridhjetë mijë boshnjakë të tjerë janë larguar, një shifër kjo tepër e madhe për popullsinë tonë të vogël."

Që prej asaj kohe tensionet janë pakësuar në njëfarë mënyre, por boshnjakët ende kanë probleme për të folur gjuhën e tyre. Shqiptarët shpesh ngatërrojnë gjuhën bosnjake dhe gjuhët e tjera sllave me serbishten, gjç qç sjellë pasoja të rrezikshme. Vitin e kaluar një punonjës bullgar i një OJQ-je u vra sapo mbërriti në Prishtinë, sepse fliste bullgarisht, e cila ngatërrohet lehtësisht me serbishten.

Megjithatë gjuha boshnjake ende mësohet në disa shkolla në Kosovë dhe gjendja është përmirësuar ndjeshëm. Por në disa zona shqiptarët ende janë kundërshtues ndaj pranisë së pakicave.

Në Kosovë ndoshta ndodhen rreth 10,000 boshnjakë, të cilët nuk dëshirojnë të largohen. Por ata ndjehen të harruar nga komuniteti ndërkombëtar, i cili, sipas tyre, nuk u jep atyre fondet e nevojshme. Në prag të zgjedhjeve, politikanët e tyre kanë patur mundësi për vetëm një transmetim të shkurtër lajmesh në stacionin televiziv publik Radio Televizioni i Kosovës.

Megjithëse autoritetet ndërkombëtare në Kosovë bëjnë shumë zhurmë rreth përmirësimit të gjendjes së grupeve të minoriteteve, fjalët e tyre janë kryesisht për serbët dhe romët. Pakicat e tjera si boshnjakët, turqit dhe ashkalitë, kryesisht janë injoruar.

Por drejtuesit e SDA-së janë optimistë për të shtunën. Boshnjakët po mbështesin shpresa të mëdha tek zgjedhjet duke besuar se administratat e reja lokale do të njohin dëshirën e komunitetit të tyre për të jetuar në paqe me fqinjët e tyre shqiptarë. "Ne jemi shumë të kënaqur me fushatën tonë elektorale, sepse kemi treguar se dimë të jetojmë së bashku dhe se jo-shqiptarët të cilët nuk kanë kryer krime mund të bashkëjetojnë me popullsinë lokale," ka thënë Baliq.

Një miting për tolerancën i mbajtur në rrugën Nënë Tereza në Prishtinë më herët këtë muaj mblodhi mijëra shqiptarë dhe boshnjakë.

"Fillimisht do të flas në gjuhën time boshnjake," ka thënë Baliq në këtë miting, "për t'i treguar botës se edhe gjuhët e tjera krahas shqipes mund të fliten lirisht këtu dhe se shqiptarët nuk kanë asgjë kundër nesh."

Këto fjalë janë duartrokitur edhe më tepër se kur shefi i misionit të Organizatës së Kombeve të Bashkuara Bernar Kushner u përpoq të flasë në shqip.

Gani Lajqi është gazetar i së përditëshmes shqiptare Koha Ditore në Prishtinë.